د.محمد حلاويةذكرى جمل التحرير .. والسر مازال في بير .. وسماح بقى يا ابن عمي
---------------------------------------------------------------
وسماح بقى يا ابن عمي
-----------------------------
إلهي اشوُفَكْ .. مِحَنّي (خُفوفَكْ) .. وفرحان كِدَه .. في الوطن متْهنّي .. يا جمل .. والله كان .. غصْبْ عنّي .. يا جمل .. سماح بقى يا ابن عمّي .. والله همَّكْ زيّ همّي .. وزيك متحمّل سنين بالحمايل .. وانت جاي .. وانت رايح .. وانت بارك .. وانت شايل .. يا جمل .. أهو انتَ شُفْتْ كات إيه العَمايّل .. كمّمُوني وكمّمُوك .. عمّمُوني وعمّموك .. وزيّنُوك .. وأوام خدوك ع التحرير .. وانت شايل .. فوق سنامك شَبْ عاطل .. شب حالم .. وشب مايل .. وشب شاب .. وشب ياما شاف العذاب .. وشب ياما شاف الهوايل .. يا جمل .. يا اللي ع التحرير رُحت وشايلْنِي ورجعت شايْلَك .. يا جمل .. بلاش تسيبني كتير أحايْلَك .. بطّل بقى تتهِمْني .. بطل تلومْني .. يا جمل انطق واقول إنك فاهمني .. والله دمك لما سال .. سال جنبُه دمّي .. وسماح بقى .. سماح بقى يا ابن عمّي .. وإلهي أشوُفَكْ مِحَنّي خُفوفَكْ .. وفرحان كِدَه .. في الوطن متْهنّي
ليست هناك تعليقات:
إرسال تعليق